Salam,
Debug əmrinin törətdiyi fəsadlar şəbəkə inzibatçılarına yaxşı tanışdır. Debug əmrinin istənilən növünü işə salmazdan əvvəl bu əmrin hansı fəsadlar törədə biləcəyini düşünmək lazımdır. debug ip icmp əmri heç bir fəsad törətməsə də, debug ip packet əmrinin və ya eyni anda işə salınmış bir neçə debug əmrinin fəsadları ağır ola bilər. Hətta sizin növbədənkənar ezamiyyətə yollanılmanıza səbəb ola bilər. Bu halın baş verməməsi üçün sadə bir metoddan istifadə edəcəyik.
Fərz edək ki, şirkətinizin Bakı və Ankara ofisləri var. Ankara ofisində problem olduğu üçün Ankara ofisindəki routera telnet vasitəsilə qoşulub, problemi aradan qaldırmaq istəyirisiniz. Bunun üçün ilk növbədə routerda nə baş verdiyni debug əmrinin köməyilə analiz etmək lazımdır. Ankara routera telnet vasitəsilə qoşulaq.
Telnet və səlahiyyətli icraçı mod üçün şifrələrimizi daxil edək.
Ankara routera qoşulduqdan sonra debug əmrini daxil edirik. Əmrin daxil edilməsinə baxmayaraq, telnet pəncərəsində heç bir məlumat əks olunmadı.
Bir az google-da axtarış etdikdən sonra anlayırıq ki, bunun üçün xüsusi bir əmr yazmaq tələb olunur. Əmri yazaq və nəticəyə diqqət edək.
Ankara#terminal monitor
Bu əmri yazdıqdan sonra telnet pəncərəsində o qədər məlumat əks olunacaq ki, Ankaradakı routerin idarəsini itirəcəyik. Çoxsaylı debug mesajları debug əmrini dayandırmaq üçün əks əmri yazmağa imkan verməyəcək. Ankaradakı routeri itirdik. Routeri bərpa etmək üçün routerin konsol portuna bağlanmaq lazımdır. Rəhbərlikdən töhmət almağa və Ankaraya növbədənkənar ezamiyyətə getməyə hazırlaşın. Birincisi xoşagəlməz olsa da, ikincisinə “yaxşı” deyə bilərsiniz. Həm routeri düzəldərəm, həm də Ankaranı gəzərəm. Amma bu ezamiyyət ayın sonunda sizin maaşınızda azalmaya səbəb olarsa, əminəm ki, “yaxşı” deməyəcəksiniz. Belə fəsadın baş verməməsi üçün debug əmrini Ankaradakı routera tətbiq etməzdən əvvəl Ankaradakı routera ikinci telnet sessiyanı açmaq lazımdır. Birinci telnet sessiyada debug əmrini işə salırıq. İkinci telnet sessiyada isə debug əmrini undebug all əmrinin köməyilə söndürürük.
Xəbərdalıq: Məqalə maarifləndirici xarakter daşıyır. İstehsalatda tətbiq edəcəyiniz debug əmrinə görə heç bir məsulliyyət daşımıram.
Uğurlar!
Amal
CCNA/CCNP/CCNA Security/CCAI